Eiry Wiliams o Geredigion yn ennill Bwrsariaeth Cynhadledd Ffermio Rhydychen CAFC 2026

Mae’n bleser gan Gymdeithas Amaethyddol Frenhinol Cymru gyhoeddi mai Eiry Williams yw enillydd ei Bwrsariaeth Cynhadledd Ffermio Rhydychen 2026, sef gwobr flynyddol wedi’i chynllunio i gefnogi’r genhedlaeth nesaf o arweinwyr yn y diwydiant amaethyddiaeth.

Bob blwyddyn, mae’r Gymdeithas yn cynnig bwrsariaeth i alluogi rhywun ifanc i fynd i Gynhadledd Ffermio Rhydychen, sef cynhadledd bwysig a gynhelir ddechrau mis Ionawr bob blwyddyn. I fod yn gymwys, rhaid i ymgeiswyr fod rhwng 21 a 35 oed, wedi byw yn yr ardaloedd a wasanaethir gan Bwyllgorau Cynghori Sirol CAFC ers o leiaf bum mlynedd, ac yn gweithio mewn diwydiant sy’n gysylltiedig â’r tir. Bydd yr ymgeisydd llwyddiannus hefyd yn cael gwahoddiad i ysgrifennu erthygl ar gyfer Blwyddlyfr y Gymdeithas 2026, yn edrych yn ôl dros eu profiad.

Bydd Cynhadledd 2026, ar y thema “Meithrin Cydnerthedd”, yn cael ei chynnal rhwng 7 a 9 Ionawr 2026. Mae’r digwyddiad wedi cael ei gydnabod ers amser maith fel un o lwyfannau mwyaf dylanwadol y diwydiant, ac mae’n dod â ffermwyr, gwleidyddion, gwyddonwyr a gweithwyr proffesiynol o gefn gwlad at ei gilydd i drafod materion allweddol ac i archwilio dyfodol amaethyddiaeth. Bydd rhaglen y flwyddyn nesaf yn dathlu gallu’r sector i addasu, gan dynnu sylw at gyfleoedd ar gyfer cenedlaethau’r presennol a’r dyfodol. Bydd hefyd yn myfyrio ar y gwaddol a drosglwyddwyd dros flynyddoedd o arloesi a stiwardiaeth.

Enwebodd y Pwyllgorau Cynghori Sirol yr ymgeiswyr canlynol, a gafodd gyfweliad o flaen panel o feirniaid a oedd yn cynnwys Mr Jonathan H. Davies (cynrychiolydd y Gymdeithas) a Dr Cennydd Jones (enillydd bwrsariaeth 2025):

• Ceredigion – Eiry Williams
• Clwyd a Swydd Gaer – Mared Jones
• Trefaldwyn – Charlie Cooper Harding
• Sir Fynwy – Dominic Hampson-Smith
• Maesyfed – Ella Harris

Canmolodd y beirniaid bob un o’r ymgeiswyr am eu brwdfrydedd, eu hymrwymiad a’u hangerdd dros ddyfodol y diwydiant amaethyddiaeth, gan nodi safon drawiadol y rheiny a gafodd gyfweliad a’r optimistiaeth galonogol a rannwyd am y ffordd wledig o fyw.

Wedi dwys ystyried, cytunodd y panel y dylid dyfarnu Bwrsariaeth Cynhadledd Ffermio Rhydychen 2026 i Eiry Wiliams o Langwyryfon, Aberystwyth, Ceredigion.

Ar hyn o bryd mae Eiry yn gweithio fel Hwylusydd Olyniaeth i Cyswllt Ffermio ac mae ganddi radd Anrhydedd Dosbarth Cyntaf mewn Biowyddorau Milfeddygol o Brifysgol Aberystwyth. Yn flaenorol, mae hi wedi gweithio fel ymchwilydd i Brifysgol Aberystwyth a Hybu Cig Cymru, ac wedi cwblhau PhD am strategaethau ar gyfer rheoli nematodau yn ystod y cyfnod peripartwraidd mewn mamogiaid . Â hithau’n aelod ymroddgar o CFfI Llangwyryfon, mae Eiry wedi ennill nifer o wobrau ar lefel sirol a chenedlaethol am siarad cyhoeddus a beirniadu stoc, a chafodd ei henwi’n Uwch Aelod y Flwyddyn yn 2025.

Mae’r Gymdeithas yn llongyfarch Eiry ar ei chyflawniad ac yn dymuno pob llwyddiant iddi yng Nghynhadledd Ffermio Rhydychen 2026.

Cyflwynir y wobr i Eiry ddydd Llun 24 Tachwedd yn ystod seremoni agoriadol y Ffair Aeaf, a gynhelir ar Faes y Sioe Frenhinol yn Llanelwedd, Llanfair-ym-Muallt.

Am ragor o wybodaeth am y Ffair Aeaf neu i brynu tocynnau, ewch i wefan CAFC.