Siroedd Nawdd

Bob blwyddyn mae gan y gymdeithas Sir Nawdd wahanol. Mae gwreiddiau hyn yn hanes cynnar y sioe, pan oedd ei lleoliad yn newid o flwyddyn i flwyddyn gan symud o gwmpas hen siroedd Cymru.

Ers symud i’n cartref parhaol yn Llanelwedd ym 1963, mae’r siroedd yn cymryd eu tro i fod yn Sir Nawdd. Yn ystod eu blwyddyn, mae’r Sir Nawdd yn penodi Llywydd a Llysgennad y Gymdeithas, yn ogystal â chymryd cyfrifoldeb am godi arian a threfnu amrywiaeth o ddigwyddiadau i hyrwyddo gwaith y Gymdeithas a’i digwyddiadau.

Strwythur unigryw Cymdeithas Amaethyddol Frenhinol Cymru o siroedd nawdd a phwyllgorau ymgynghorol sy’n gosod y Gymdeithas ar wahân i eraill ac yn sicrhau bod pobl Cymru yn parhau i deimlo perchnogaeth dros y digwyddiadau. Mae ymdrechion codi arian yr holl siroedd ers 1963 wedi cyfrannu miliynau o bunnoedd, gyda’r cyfan yn cael ei ailfuddsoddi ym maes y sioe, gan ei wneud yn un o’r goreuon yn Ewrop. Mae hyn wedi creu ymdeimlad gwirioneddol o berchnogaeth ar y cyd o’n safle.