Rhagofalon Diogelwch Tywydd Poeth Sioe Frenhinol Cymru

Mae Cymdeithas Amaethyddol Frenhinol Cymru yn rhoi protocolau tywydd poeth yn eu lle ar gyfer
Sioe Frenhinol Cymru 2022 a fydd yn dod i rym pan fydd y sioe’n cychwyn ar ddydd Llun 18fed
Gorffennaf. Gyda thywydd poeth yn cael ei ddarogan ar gyfer dechrau’r Sioe, mae’r Gymdeithas yn
cymryd rhagofalon ychwanegol ac yn gweithio’n galed gyda’n partneriaid i liniaru peryglon gwres
ac i wella diogelwch pobl ac anifeiliaid.

Mae’r rhagofalon yr ydym wedi’u rhoi yn eu lle i ddiogelu’r bobl hynny sy’n ymweld, yn arddangos
ac yn gweithio yn y Sioe fel a ganlyn;

• Bydd gennym adnoddau dŵr ychwanegol i’r safle a’r ardal leol, ar gyfer da byw ac ar
  gyfer pobl.
• Mae defnydd barbeciwiau siarcol dros dro wedi’i wahardd ar bob safle oherwydd perygl
  tân.
• Mae cyngor diogelwch cyhoeddus wedi’i gyhoeddi yn atgoffa ymwelwyr i wisgo eli haul,
  a het haul ac i ddod â photel ddŵr i wneud defnydd o’n nifer o fannau ail-lenwi dŵr o
  gwmpas maes y sioe i gadw eu hunain wedi’u hydradu.
• Mae mannau eistedd dan do ychwanegol wedi’u creu i ymwelwyr gael seibiant yn y
  cysgod nesaf at y Babell Garddwriaeth ac o fewn ardal y Cyngor.
• Mae codau gwisg i’n swyddogion a’n cystadleuwyr yn cael eu llacio yn ôl y galw.
  Fel ag yn y blynyddoedd blaenorol, ni chaniateir cŵn ar y safle (heblaw am gŵn cymorth) a rhaid
  peidio â’u gadael mewn ceir.
• Mae mesurau diogelwch ychwanegol yn cael eu rhoi yn eu lle gan weithio ochr yn ochr â Grŵp
  Cynghori ar Ddiogelwch Llanfair-ym-Muallt.
• Rydym yn gofyn i bawb sy’n ymweld â’r sioe ddilyn y cyngor ar Iechyd Cyhoeddus Cymru. I gael
  mwy o wybodaeth am ddiogelwch yn ein digwyddiadau ewch i’n gwefan.

Lles Da Byw
Mae llawer o ddarpariaethau’n cael eu gwneud hefyd o fewn yr adran dda byw. Bydd dŵr
ychwanegol ar gael, ac mae gwyntyllau wedi’u gosod ym mhob un adeilad da byw gyda gwyntyllau
wedi’u huwchraddio newydd yn y mannau sydd dan fwyaf o fygythiad. Mae’r amseroedd cyrraedd i
dda byw wedi’u newid er mwyn croesawu stoc yn gynnar yn y bore ac yn hwyr min nos, i osgoi
ciwiau ar yr adegau poethaf o’r dydd.

Bydd milfeddygon y Gymdeithas ar ddyletswydd tra byddir yn gosod pethau i fyny ac ar hyd y Sioe
ar gyfer unrhyw gymorth milfeddygol, gyda stiwardiaid ar gael hefyd i helpu gydag unrhyw
broblemau a all ddigwydd.

Bydd y tymheredd yn yr adeiladau da byw yn cael ei fonitro’n barhaol, i gefnogi penderfyniadau
amser real. Bydd ystyriaeth yn cael ei rhoi hefyd i amseriadau dosbarthiadau, y gellir eu newid os
bydd angen.

Mae’r Gymdeithas yn gweithio mewn partneriaeth â’r Swyddfa Dywydd, Dŵr Cymru, Iechyd
Cyhoeddus Cymru, Y Prif Swyddog Milfeddygol, yr Awdurdod Lleol a’r holl wasanaethau golau
glas i sicrhau bod Sioe Frenhinol Cymru yn llwyddiant ysgubol, er gwaethaf y tywydd a ragwelir.

Rydym yn edrych ymlaen yn fawr iawn at groesawu pawb yn ôl i Faes y Sioe yn Llanelwedd yr
wythnos nesaf ar gyfer yr hyn sy’n addo bod yn sioe wych.