Ymweliad Brenhinol yn Sioe Frenhinol Cymru 2022

Mae’n hyfrydwch gan CAFC y bydd Ei Huchelder Brenhinol, Y Dywysoges Frenhinol yn ymweld â Sioe Frenhinol Cymru eleni, ar yr ail ddiwrnod, dydd Mawrth 19^eg Gorffennaf 2022.

A hithau wedi ymweld â Sioe Frenhinol Cymru gyntaf yn ôl yn 1981, mae’r Dywysoges Frenhinol yn un o sawl aelod o’r teulu Brenhinol sy’n ymwelwyr rheolaidd â digwyddiadau’r Gymdeithas.

Mae cysylltiadau Brenhinol y Gymdeithas yn mynd yn ôl i 1907 pan, dair blynedd ar ôl sefydlu’r gymdeithas, y daeth y Brenin Siôr V, oedd yn Dywysog Cymru bryd hynny, yn Noddwr, gyda’r Brenin Siôr VI yn ei ddilyn yn 1936. Cymerodd y Frenhines y swydd drosodd yn 1952 ac mae hi’n dal yn Noddwr hyd at heddiw.

Yn ymuno â ni ar ail ddiwrnod y sioe, dyma fydd chweched ymweliad y Dywysoges Frenhinol â Maes Sioe Frenhinol Cymru yn Llanelwedd, ar ôl ymweld ddiwethaf yn 2014 ar gyfer y Ffair Aeaf.

Meddai Steve Hughson, Prif Weithredwr CAFC: “Rydym yn gyffrous dros ben o groesawu EHB Y Dywysoges Frenhinol yn ôl i Sioe Frenhinol Cymru, gan atgyfnerthu ein cysylltiadau cryf â’r teulu Brenhinol a’n Noddwr Ei Mawrhydi’r Frenhines.”

Bydd y Dywysoges Anne yn cyrraedd fore dydd Mawrth a bydd hi’n mynd ymlaen gyda thaith o amgylch Maes Sioe Frenhinol Cymru, yn cael ei hebrwng gan Gyfarwyddwr y Sioe, Richard Price. Yn ystod yr ymweliad, bydd hi’n mynychu’r Seremoni Wobrwyo ble bydd hi’n cyflwyno nifer o wobrau.

Mae’n anrhydedd gan y Gymdeithas groesawu’r Dywysoges Frenhinol yn ôl i Sioe Frenhinol Cymru, ac edrychwn ymlaen at ei hymweliad mawr ddisgwyliedig yr wythnos nesaf.

Mae Sioe Frenhinol Cymru’n dechrau ar ddydd Llun 18^fed Gorffennaf ac yn rhedeg am bedwar diwrnod, gyda rhaglen 12 awr lawn o gystadlaethau, atyniadau, stondinau masnach, ac arddangosfeydd y Prif Gylch. I gael mwy o wybodaeth am y Sioe neu i brynu tocynnau, ewch i  wefan CAFC.