Diwrnod cyntaf Sioe Geffylau yr Hydref CAFC yn cael ei ystyried yn llwyddiant gyda’r holl fynychwyr yn gyffrous i fod ar Faes Sioe enwog y Sioe Frenhinol yn Llanelwedd unwaith eto

Mae’n hyfrydwch gan Gymdeithas Amaethyddol Frenhinol Cymru fod arddangoswyr, gwirfoddolwyr ac aelodau’r cyhoedd wedi teithio i Faes y Sioe i fod yn rhan o’r digwyddiad deuddydd untro hwn.

Ar ôl methu gallu cynnal digwyddiad ar Faes Sioe Frenhinol Cymru er Ffair Aeaf 2019 oherwydd y pandemig Coronafeirws, mae’r Gymdeithas ar ben eu digon gyda’r gefnogaeth a gafwyd ar ddiwrnod cyntaf Sioe Geffylau yr Hydref.

Cyrhaeddodd llawer o arddangoswyr ar y nos Wener gyda gwên ar eu hwynebau wrth iddynt gyfarfod hen gyfeillion a chystadleuwyr eraill sydd wedi gwneud y daith hirddisgwyliedig yn ôl i Faes y Sioe unwaith eto i gystadlu am eu teitlau clodfawr priodol yn Sioe Geffylau eleni.

Wrth i’r cystadlaethau dynnu at eu terfyn ar ddiwrnod cyntaf y Sioe, mae pawb yn barod am yr hyn sy’n addo bod yn ddiwrnod cyffrous arall eto yfory (19/09/2021). Ar ôl derbyn dros 1200 o geisiadau ar gyfer y cystadlaethau sy’n digwydd mae’n dipyn o olygfa unwaith eto gweld pawb yn cystadlu yn y tri chylch ar draws Maes y Sioe.

Meddai Chris Davies, Cyfarwyddwr Anrhydeddus Cynorthwyol: ‘Rydym wedi ein syfrdanu gan y gefnogaeth yr ydym wedi’i derbyn i’r sioe geffylau, wrth i Gymdeithas Amaethyddol Frenhinol Cymru gynnal ei digwyddiad cyntaf ers cyn y pandemig. Rydym i gyd yn ddiolchgar iawn i bawb sydd wedi cystadlu a hefyd wedi mynychu’r sioe geffylau gan eu bod wedi bod yn amyneddgar iawn gyda’r Gymdeithas yn gorfod cydymffurfio â chanllawiau diweddaraf Llywodraeth Cymru a hefyd yn gweithredu rheoliadau Tracio ac Olrhain o gwmpas Maes y Sioe. Mae tocynnau yn dal i fod ar gael i’w prynu ac maent ar werth tan ganol dydd yfory drwy ein gwefan os hoffech chi ymuno â ni ddydd Sul.’