Enillydd Gwobr Menter Bwyd o Gymru CAFC wedi’i Gyhoeddi

Mae Gwobr Menter Bwyd o Gymru CAFC yn wobr flynyddol newydd er cof am y diweddar Mr Bill Ratcliffe OBE FRAgS a fu’n gysylltiedig â’r Gymdeithas am fwy na 60 mlynedd ac a fu’n gyfarwyddwr am dros 30 mlynedd. Un o’i ddiddordebau allweddol oedd bwyd, yn arbennig y busnesau fferm hynny sydd wedi arallgyfeirio a datblygu marchnadoedd a safleoedd i werthu eu cynnyrch yn uniongyrchol i ddefnyddwyr.

Cyhoeddwyd y wobr flynyddol newydd am y Cynhyrchydd/Gwerthwr Bwyd a Diod Cymreig Gorau sy’n Arddangos yn Sioe Frenhinol Cymru yn seremoni wobrwyo ddoe (19^eg Gorffennaf 2022). Mae’r Gymdeithas wrth ei bodd fod dau fab Mr Ratcliffe, Alistair ac Anthony, ill dau wedi gallu ymuno yn y seremoni wobrwyo ac wedi beirniadu cystadleuaeth eleni gyda Mr Gareth Roberts, Aelod o Fwrdd y Gymdeithas.

Sioe eleni fu’r cyfle cyntaf i feirniadu’r gystadleuaeth newydd. Digwyddodd y beirniadu ar ddiwrnod cyntaf y Sioe, gyda chyfanswm o bedwar ar bymtheg o fusnesau wedi cynnig yn y gystadleuaeth. Enillwyr Gwobr Menter Bwyd o Gymru CAFC ar gyfer 2022 yw Môn ar Lwy – Taste of Anglesey.

Busnes bach ar Ynys Môn yw Môn ar Lwy – Taste of Anglesey, sydd wedi arallgyfeirio eu busnes ffermio ac sy’n awr yn creu hufen iâ moethus ar y fferm gan ddefnyddio llaeth Jersey a hufen Cymreig.

Bu sylfaenydd a pherchennog y busnes, Helen Holland yn athrawes am 35 mlynedd ac arallgyfeiriodd y fferm bedair blynedd ar ddeg yn ôl ar ôl colli ei thad. Eleni maen nhw’n defnyddio llaeth Jersey o’r ansawdd gorau o fuches sydd newydd ei sefydlu ar Ynys Môn. Disgrifiodd Helen sut y maen nhw’n defnyddio’r cynnyrch gorau i greu’r cynhyrchion gorau, mae’r llaeth Jersey fel ‘aur hylifol’.

Wrth wneud sylw am fod y busnes cyntaf i ennill y wobr, meddai Helen “Rydym ar ben ein digon. Mae o’n gymaint o hwb gwych ar ôl y tair blynedd ddiwethaf yn dilyn y pandemig.” Mae Helen yn ddiolchgar fod Sioe Frenhinol Cymru wedi dychwelyd, a hithau wedi bod yn masnachu’n rheolaidd yn y sioe am y pedair blynedd ar ddeg ddiwethaf.

Mae’r Gymdeithas yn cydnabod yn ddiolchgar y nawdd i’r Wobr gan Mr Alistair Ratcliffe a Mr Anthony Ratcliffe a’u teuluoedd.