Adroddiad Ffair Aeaf 2024

Unwaith eto, mae’r Ffair Aeaf wedi profi’n llwyddiant ysgubol, gan ddenu miloedd o ymwelwyr i Faes y Sioe yn Llanelwedd am ddau ddiwrnod o ddathliadau tymhorol, cystadlaethau a dangosiadau diwydiant.
Roedd ail ddiwrnod yr Ŵyl yn gyfuniad bywiog o weithgarwch, gyda chynhyrchwyr, masnachwyr ac ymwelwyr yn ymgolli mewn rhaglen eang o gystadlaethau, arddangosiadau, ocsiynau a siopa. Ffair eleni oedd yr un fwyaf hyd yma, gyda nifer eang o stondinau bwyd a manwerthu amrywiol.
Addysg ac Ymgysylltu
Bu dros 2,000 o blant ysgol a myfyrwyr yn bresennol dros y ddau ddiwrnod, gan fanteisio ar fynediad am ddim ar gyfer teithiau ysgol cynradd ac uwchradd trefnedig, yn ogystal â chyfraddau gostyngol ar gyfer grwpiau addysg bellach ac uwch. Roedd thema ysgolion cynradd eleni, “Ein Dŵr, yn cynnig profiad addysgol ymgysylltiol. Cafodd disgyblion Blynyddoedd 5 a 6 eu swyno gan weithdai dan arweiniad Dŵr Cymru, y Fyddin, yr addysgwr Phillip Cressey, a’r Prosiect Gwyddoniaeth Fawr, tra bod adnoddau dysgu ar rôl dŵr mewn amaethyddiaeth ar gael drwy Twinkl a gwefan y Gymdeithas.
Cyflwynodd Tom Pemberton, seren boblogaidd YouTube ‘Tom Pemberton’s Farm Life’, dystysgrifau i’r ysgolion a gymerodd ran ac fe rhannodd fewnwelediadau am ddefnyddio dŵr ar ei fferm laeth. Bu disgyblion yn ymateb yn frwdfrydig iddo, gan holi am pob agwedd o’i fywyd amaethyddol.
Cystadlaethau a Dathliadau
Ymunodd Pemberton hefyd â Mr. Neil Fenn a Mr. Stewart Williams o Castell Howell i feirniadu’r gystadleuaeth selsig yn adran Cynhyrchion Cig, cyn profi’r ocsiynau da byw prysur a chyfarfod cefnogwyr yn y Siop Sioe.
Unwaith eto, roedd cystadlaethau da byw wrth galon yr ŵyl, gyda nifer record o gofrestriadau, yn enwedig yn yr adran defaid.

• Pencampwr Uchaf Gwartheg: ‘Twilight’, heffer o dras Limousin a fridwyd gan Tecwyn Jones, Caer Gwrli, Ynys Môn, a werthwyd am £8,500 i’r cigydd lleol Arwyn Morgans, Morgans Family Butchers, Llanfair-ym-Muallt.
• Pencampwr Uchaf Defaid: Pâr o wyn Beltex gan E.F. Gittoes & Son, Fferm Bryndu, Powys, a werthwyd am £650.
• Pencampwriaethau Moch: Enillwyd y teitlau unigol a phâr gan Myrddin James, Dolaeron, Ceredigion, gyda moch Pietrain x Cymreig. Gwerthwyd yr unigolyn am £400 a’r pâr am £350.
• Pencampwr Uchaf Ceffylau: Coedwigddu Princess Rosia, Cob Cymreig Adran D o S. James, Brynlluan, Sir Gaerfyrddin, a’i drin gan Gareth Lapping.
• Gwobr Stondin Fasnach Gorau yn Gyffredinol: ‘Wales Perfumery’.

Cefnogaeth Gymunedol a Diwydiannol

Mae llwyddiant y Ffair yn cael ei briodoli i ymroddiad y pwyllgor trefnu, cynhyrchwyr, masnachwyr, gwirfoddolwyr a stiwardiaid, ynghyd â chefnogaeth hael noddwyr. Chwaraeodd noddwyr pennaf, gan gynnwys HSBC, Llywodraeth Cymru a Dunbia, ochr yn ochr ag eraill, ran hanfodol yn llwyddiant y Ffair eleni.
“Mae’r Ffair eleni wedi bod yn llwyddiant mawr,” meddai Cyfarwyddwr y Ffair Aeaf, William Hanks. “Er gwaethaf tywydd garw cyn y Ffair, bu niferoedd yr ymwelwyr yn gryf, ac roedd ymdeimlad gwych o gydweithrediad ar y maes sioe.”
“Rydym yn ddiolchgar iawn i bawb a gyfrannodd at lwyddiant y Ffair yma. O’n gwirfoddolwyr a’n stiwardiaid i’r arddangoswyr a’r noddwyr, mae eich cefnogaeth yn sicrhau bod y Ffair Aeaf yn parhau’n draddodiad gwerthfawr. Edrychwn ymlaen at groesawu pawb yn ôl i ddigwyddiadau’r flwyddyn nesaf.”